Visita de Antonio M. Fraga

  Hoxe os alumnos dos clubs de lectura de 5º e 6º e os seus compañeiros de aula tiveron o pracer de coñecer ao autor dun dos libros que leron este ano "Como escorrentar un lobo".

Antonio M. non é a primeira vez que ven ao noso colexio, pero si é a primeira que coñece aos alumnos de 5º e 6º.

Durante 1 hora estiveron conversando sobre o libro, primeiro fíxolle unha pequena presentación e logo e falaron de todas as inquedanzas que lles supuxo a súa lectura. 

Homenaxe a Castelao

Este 2025 celébrase o 75º aniversario da morte de Daniel Alfonso Rodríguez Castelao, unha das personalidades máis influíntes da Galicia contemporánea. Institucións, entidades da sociedade civil, e tamén nos, queremos celebrar o seu legado artístico, político e social.

Por iso eleximos Cousas para o club de lectura da ESO

Novela gráfica en 6º

 Ao grupo de 6º interésalle todo pero este ano sobre todo novela gráfica

Triloxía La asistenta

 Os alumnos de secundaria de este ano buscan thrillers psicolóxicos...e decantáronse pola triloxía de "La Asistenta" de Freida McFadden. Unha adictiva novela da serie mais viral do momento.

A serie é coñecida polo seu ritmo vertixinoso, xiros inesperados e humor negro.

 

 

 

O neno can

O novo libro  no club de lectura de 5º é "O neno can" de Fina Casalderrey e Francisco Castro.

O neno can é un libro de relatos nos que quixeron abordar asuntos relacionados cos dereitos da infancia, ou máis ben, coa falta de dereitos básicos que unha parte moi importante dos nenos e nenas do mundo padecen hoxe en día. Así, cóntannos historias deses cativos que teñen que sobrevivir remexendo nos colectores de lixo; a epopea desas nenas obrigadas a casar con homes adultos cando aínda nin deixaron as bonecas; a discriminación de quen é diferente por calquera motivo e así carne de canón social.

A artista Patricia Castelao puxo o punto plástico perfecto para que poidamos gozar dun libro que, ademais de apostar pola xustiza e a liberdade, nos agasalla cunhas historias cheas de vida, a pesar da crueza das realidades que conta, e que van engancharnos dende a primeira liña.

"Como escorrentar un lobo"

O novo libro no club de lectura de 6º é unha recomendación que nos fixeron dende a editorial Cuarto de inverno.

Ano 1944. Nunha Polonia ocupada polos nazis, Noncia rescata dúas crianzas xudeas do seu tráxico destino e agóchaas na súa casa. Para as axudar a combater o medo, relátalles unha incrible aventura que viviu na súa infancia, cando percorría os camiños acompañando o tabor xitano ao que pertencía. A historia trasládaos ao corazón do misterioso bosque de Białowieża, onde a familia de Noncia, tras extraviarse no medio dunha treboada, chega á vila secreta de Polana Wilków, o fogar dos Neuri. Alí coñecerá as distintas criaturas fantásticas que se agochan no bosque e aprenderá a mirar o medo cara a cara.

O seu autor, Antonio M. Fraga, xa o coñecemos na biblioteca pois lemos a novela de literatura fantástica "Querido H.P. Lovecraft" e posteriormente tivemos un encontro con el.

Esperemos que este novo libro nos emocione como o outro.

Encontros con 5º

 As nosas reunións cada 15 días sabénnos a pouco. Somos moitos e non nos chega o tempo para ler, para contar e para falar do que estamos lendo....